2Cor 6 | ZomZIV | STEP | Pasian tawh na semkhawm ka hi uh bangin Pasian hehpihna kimanna a nei lo-a ngah na suah loh nadingun kong thum uh hi.

2 Corinthians 6

1 Pasian tawh na semkhawm ka hi uh bangin Pasian hehpihna kimanna a nei lo-a ngah na suah loh nadingun kong thum uh hi.

2 Ahang in amah in, “Kong angvan hunin note kong za a,
hotkhiatna ni-in note kong huh hi,” ^{▼▼6.2 Isa. 49:8} ci hi.

Pasian angvan hun tuhun hi-a, hotkhiatna ni tuni ahi hi, cih kong gen hi.

Paul Haksatnate

3 Kote nasep a kiminsiatsak loh nadingin kuama lamlai-ah kimuktuk nading ka koih kei uh hi. 4 Pasian nasemte ka hi mah bangun lam khempeuh ah ko le ko a phathuai-in ka kilangsakzaw uh a: bawlsiatna thuakna ah; lungmanna ah, haksatna le lungdonna ah; 5 satnate ah, koltanna le ngongtatna ah; naham sepna, zana ihmut theihlohna le gilkialna ah; 6 siangthona, theihtelna, lungduaina le migitna ah; Khasiangtho le it takpina in; 7 thutaka genna le Pasian vangliatna tawh; veilam le taklama thumaanna galhiam tawh; 8 minthanna le simmawhna lakah, siatgenna le phatgenna lakah; a taktak hi napi a khema kingawhna bangin, 9 kithei napi a kithei lo bangin; sidekdek napi ka nungta uh hi; hong kisatgawp napi hong kithat liang lo a; 10 dah napi ka lungnuam tawntung uh a; zawng napi mi tampi ka hausak uh a; bangmah nei lo napi, na khempeuh ka nei uh hi.

11 Corinth-te aw, note kiangah siit nei loin thu kong gen uh a, ka lungtang uh zapi kong hon uh hi. 12 Kote in note tungah ngaihna ka kidaam het kei uh a, kote tungah note na kidaam zaw uh hi. 13 Ko aa bangin a kilawma nong thukna-un note in zong na lungtang uh zapi in hong hon un, ci-in tate tunga thugen bangin kong gen uh hi. ^b

Thu-umlote Tawh Hakkol Zawng Kei Un

14 Thu um lote tawh hakkol na zawng khawm kei un. Ahang in, thumaanna le gitlohna in bang kikop khawm ahi hiam? Ahikeh khuamial le khuavak in bang kipawl khawmna nei thei ahi hiam? 15 Christ le Belial ^{▼▼6.15 Greek ah Beliar, Belial mindang} kikal ah bang kithutuahna om ahi hiam? A umte le a um lote in bang neikhawm ahi hiam? 16 Pasian biakinnpi le milimte kikal ah bang kithukimna om ahi hiam? Ahang in, eite a nungta Pasian biakinnpi i hi hi. Pasian in: “Amaute tawh ka teng dinga amaute lakah gamtangin, amaute Pasian ka hi dinga amaute keima mi ahi ding uh hi,” ^{▼▼6.16 Sp. 26:12; Jer. 32:38; Eze. 37:27
,} ^e

17 “Tua ahi manin amaute lak panin paikhia unla,
a tuamin om un. ^f

Topa in ci hi.
A siang lo peumah lawng kei le uhcin
note kong sang ding hi.” ^{▼▼6.17 Isa. 52:11; Eze. 20:34,41}
18 “Keimah note Pa ka hi dinga,
note ka tanu ka tapate na hi ding uh hi.

Thahatpen Topa in ci hi.” ^{▼▼6.18 2Sa. 7:14 ; 7:8} a cihsa ahi hi.